ກະຊວງອຸດສາຫະກຳ ແລະການຄ້າ ເລັ່ງຊຸກຍູ້ບໍລິສັດນຳເຂົ້ານ້ຳມັນເຊື້ອໄຟ ເພື່ອຕອບສະໜອງໄດ້ຕາມຄວາມຕ້ອງການ.

ໃນວາລະດຳເນີນກອງປະຊຸມ ສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນ ວັນທີ 16 ມິຖຸນາ 2022 ນີ້, ທ່ານນາງ ຈັນສຸກ ເເສງພະຈັນ ຮອງລັດຖະມົນຕີກະຊວງອຸດ ສາຫະກຳ ແລະ ການຄ້າ ໄດ້ຊີ້ແຈງຕໍ່ຄຳຊັກຖາມຂອງບັນດາສະມາຊິກສະພາແຫ່ງຊາດ ທີ່ຕິດພັນກັບຂະແໜງອຸດ ສາຫະກຳ ແລະ ການຄ້າ ໃນຫລາຍບັນຫາສຳຄັນ ໂດຍຢືນຢັນຈະມີການຈັດສັນນໍ້າມັນເຊື້ອໄຟ ສະເພາະ ເພື່ອສະໜອງໃຫ້ແກ່ຂະແໜງການຜະລິດກະສິກຳ ໃນຂອບເຂດທົ່ວປະເທດ ເພື່ອໃຫ້ໄດ້ ດຳເນີນການຜະລິດ ໄດ້ທັນຕາມລະດູການ ແລະ ສາມາດສະໜອງສະບຽງອາຫານ ໃຫ້ສັງຄົມໄດ້ຢ່າງ ພຽງພໍ ແລະ ມີລາຄາສົມເຫດສົມຜົນ.

ເພື່ອຮັບປະກັນການສະໜອງນໍ້າມັນເຊື້ອໄຟຢູ່ພາຍໃນປະເທດ ໃຫ້ພຽງພໍ ໃນປັດຈຸບັນ, ລັດຖະບານ ກໍຄື ກະຊວງອຸດສາຫະກຳ ແລະ ການຄ້າ ຈະຊຸກຍູ້ໃຫ້ບໍລິສັດນຳ ເຂົ້ານໍ້າມັນເຊື້ອໄຟ ສາມາດເຂົ້າຫາການແລກປ່ຽນເງິນຕາ ໄດ້ເພີ່ມຂຶ້ນ ເພື່ອຊ່ວຍກັນນຳເຂົ້ານໍ້າມັນເຊື້ອ ໄຟ ເຂົ້າມາສະໜອງການຊົມໃຊ້ຢູ່ພາຍໃນປະເທດ ໃຫ້ທົ່ວເຖິງ, ສົ່ງເສີມບັນດາໂຮງກັ່ນ, ໂຮງງານປຸງ ແຕ່ງປະສົມ ຢູ່ພາຍໃນປະເທດ ທີ່ມີການລົງທຶນໄປແລ້ວໃຫ້ສາມາດອອກມາດຳເນີນການຜະລິດ ເພື່ອ ຮັບໃຊ້ສັງຄົມ ໄດ້ເປັນປົກກະຕິ. ພ້ອມນັ້ນ, ຍັງໄດ້ປັບປຸງໂຄງສ້າງລາຄານໍ້າມັນເຊື້ອໄຟ ໃນແຕ່ລະ ໄລຍະຕາມກົນໄກຕະຫລາດທີ່ມີການດັດສົມ ຄຸ້ມຄອງຂອງລັດ ໃຫ້ແທດເໝາະກັບຕົວຈິງ, ທັງນໍາໃຊ້ ມາດຕະການແກ້ໄຂຕ່າງໆ ເປັນຕົ້ນ ຫລຸດອາກອນຊົມໃຊ້, ນຳໃຊ້ນະໂຍບາຍສະໜອງເງິນຕາ ໃຫ້ ບັນດາບໍລິສັດ ເພື່ອສາມາດແລກປ່ຽນເງິນຕາ ໄດ້ຕາມອັດຕາ ທີ່ທະນາຄານກໍານົດ, ພ້ອມນັ້ນ, ຍັງຈະ ຈັດຫານໍ້າມັນເຊື້ອໄຟ ຈາກຫລາຍແຫລ່ງ ຫລື ຈາກແຫລ່ງທີ່ມີລາຄາຖືກ ເເລະ ສາມາດຊຳລະສະສາງ ເປັນເງີນຕາຕ່າງປະເທດສະກຸນອື່ນໆ ນອກຈາກສະກຸນເງິນໂດລາ.

ຈັບຕົວຜູ້ແລກປ່ຽນເງິນຕາຕ່າງປະເທດແບບຜິດກົດໝາຍ.

ຕາມການລາຍງານຂອງເຈົ້າໜ້າທີ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ກະຊວງ ປກສ ໄດ້ໃຫ້ຮູ້ວ່າ: ໃນວັນທີ 17 ມິຖຸນາ 2022 ນີ້ ເຈົ້າໜ້າທີ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ສາມາດຈັບຕົວຜູ້ແລກປ່ຽນເງິນຕາຕ່າງປະເທດແບບຜິດກົດໝາຍໄດ້ 1 ຄົນຊື່: ທ້າວພຸດທະວົງ ອາຍຸ 25 ປີ , ຢູ່ ບ້ານ ນາທອງ ເມືອງ ໂພນໂຮງ ແຂວງ ວຽງຈັນ ໂດຍຜູ້ກ່ຽວ ມີເຈດຕະນາລະເມີດລະ ບຽບການຄຸ້ມຄອງເງິນຕາຕ່າງປະເທດແລະ ດໍາເນີນທຸລະກິດບໍ່ຖືກຕ້ອງຕາມກົດໝາຍ ເຊິ່ງຜູ້ກ່ຽວບໍ່ມີໃບອະນຸຍາດດໍາເນີນທຸລະກິດກ່ຽວກັບການແລກປ່ຽນເງິນຕາຕ່າງປະເທດ ແລ້ວໄດ້ມີການເຄື່ອນໄຫວ ໂຄສະນາແລກປ່ຽນເງິນຕາຜ່ານຊື່ສັງຄົມອອນລາຍ (ເຟສບຸກ) ໂດຍບໍ່ໄດ້ຮັບອະນຸຍາດ ຈາກພາກ ສ່ວນທີ່ກ່ຽວຂ້ອງ, ຜູ້ກ່ຽວໄດ້ໂພດຂໍ້ຄວາມລົງໃນກຸ່ມເຟສບຸກໃນຊື່ກຸ່ມແລກປ່ຽນເງິນຕາ (ໂອນ–ແລກ–ຕິດຕາມອັດຕາແລກປ່ຽນ).

ຜ່ານການສືບສວນ–ສອບສວນ ຜູ້ກ່ຽວຮັບສາລະພາບວ່າ ໄດ້ມີການເຄື່ອນໄຫວບັນ ຊີເງິນຝາກຂອງຜູ້ກ່ຽວໃນຊ່ວງເດືອນ 05 ປີ 2022  ຍອດທຸລະກໍາໃນບັນຊີ ຂອງຜູ້ກ່ຽວໃນ 1 ວັນ ມີເງິນກີບເຂົ້າບັນຊີ 270.923.000 ກີບ,  ໂອນອອກຈາກບັນຊີ ຈໍານວນ254.381.000 ກີບ, ມີເງິນບາດເຂົ້້າບັນຊີ 121.950 ບາດ, ໂອນອອກຈາກບັນຊີ 100.011 ບາດ, ມີເງິນໂດລາ ເຂົ້າບັນຊີ 12.200 ໂດລາ, ໂອນເງິນໂດລາອອກ 15.000 ໂດລາ.  ຍອດທຸລະກໍາໃນບັນຊີຂອງຜູ້ ກ່ຽວໃນ 1 ອາທິດ ມີເງິນກີບເຂົ້າບັນຊີ 755.506.000​ກີບ, ໂອນອອກຈາກບັນຊີ ຈໍານວນ 740.050.500 ກີບ, ມີເງິນບາດເຂົ້າບັນຊີ 443.650 ບາດ, ໂອນອອກ 425.054 ບາດ, ມີເງິນໂດລາເຂົ້າບັນຊີ 20.943 ໂດລາ, ໂອນອອກ 20.905 ໂດລາ, ລວມຍອດທຸລະກໍາໃນບັນຊີ ຂອງຜູ້ກ່ຽວ ໃນ 1 ເດືອນ ມີເງິນກີບເຂົ້າບັນຊີ 957.625.800​ ກີບ, ໂອນອອກຈາກບັນຊີ ຈໍານວນ957.846.000 ກີບ, ມີເງິນບາດໂອນເຂົ້າບັນຊີ 872.870 ບາດ, ໂອນອອກ 850.856 ບາດ, ເງິນໂດລາເຂົ້າບັນຊີ 31.043 ໂດລາ, ໂອນເງິນອອກ 31.116 ໂດລາ.

 ການເຮັດທຸລະກໍາຜ່ານບັນຊີເງິນຝາກຂອງຜູ້ກ່ຽວ ແມ່ນມີການເຄື່ອນໄຫວ ແລກປ່ຽນເງິນຕາຕ່າງປະເທດ ໂດຍບໍ່ ຖືກຕ້ອງຕາມກົດໝາຍ  ເພື່ອຫາກຳໄລເງິນສ່ວນຕ່າງໃນການແລກປ່ຽນປະຈໍາວັນ ເຊິ່ງຜູ້ກ່ຽວບໍ່ມີ ໜ້າຮ້ານ ໂດຍສວຍໃຊ້ການໂຄສະນາຜ່ານສື່ສັງຄົມອອນລາຍ ເພື່ອຊອກຫາລູກຄ້າແລກປ່ຽນເງິນຕາ ເຊີ່ງເປັນການປັ່ນປວນອັດຕາແລກປ່ຽນເງີນຕາຕ່າງປະເທດ ແລະ ສົງຜົນກະທົບຕໍ່ສະພາບເສດຖະກິດ-ສັງຄົມ.

​ປະຈຸບັນ ເຈົ້າໜ້າທີ່ພວມດຳເນີນຄະດີຕາມລະບຽບກົດໝາຍ.

Money gram ຍັງສືບຕໍ່ບໍລິການໃຫ້ປະຊາຊົນ ສາມາດຖອນເງິນໄດ້ຕາມປົກກະຕິ ຄືຜ່ານມາ.

ທ່ານ ນ. ຂັນແກ້ວ ຫຼ້າມະນີເງົາ ຫົວໜ້າກົມນະໂຍບາຍເງິນຕາ ທະນາຄານແຫ່ງ ສປປ ລາວໄດ້ທະແຫລງຂ່າວຜ່ານສື່ມວນຊົນ ກ່ຽວກັບ ການຄຸ້ມຄອງເງິນຕາຕ່າງປະເທດຢູ່ ສປປ ລາວ ໃນວັນທີ 15 ມີຖຸນາ 2022ນີ້ ວ່າ: ປັດຈຸບັນ ທະນາຄານທຸລະກິດ ກໍຄື ລະບົບ Money gram ຍັງສືບຕໍ່ບໍລິການໃຫ້ພໍ່ແມ່ປະຊາຊົນ ສາມາດຖອນເງິນໄດ້ຕາມປົກກະຕິ ຄືຜ່ານມາ.

ປະຈຸບັນ ທຸກຂະແໜງການ ທັງພາກລັດ ແລະ ທຸລະກິດ ກໍໄດ້ພະຍາຍາມແກ້ໄຂບັນຫາດ້ວຍມາດຕະການຈຳນວນໜຶ່ງ ຢ່າງເໝາະສົມ ໂດຍສະເພາະມາດຕະການທີ່ ທະນາຄານແຫ່ງ ສປປ ລາວ ພວມຈັດຕັ້ງປະຕິບັດ ໃນຂອບເຂດຂອງນະໂຍບາຍເງິນຕາ ແມ່ນສຸມໃສ່ປັບປຸງວຽກງານການຄຸ້ມຄອງເງິນຕາຕ່າງປະເທດ, ການແລກປ່ຽນເງິນຕາ, ການຊຸກຍູ້ສົ່ງເສີມການຂະຫຍາຍຕົວຂອງເສດຖະກິດ, ຫຼຸດຜ່ອນການເພີ່ມຂຶ້ນຂອງອັດຕາເງິນເຟີ້ ແລະ ອື່ນໆ ດັ່ງທີ່ບັນດາທ່ານໄດ້ຮັບຟັງຈາກການລາຍງານຕໍ່ກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 3 ຂອງສະພາແຫ່ງຊາດຊຸດທີ IX. ໃນການຈັດຕັ້ງປະຕິບັດມາດຕະການຕ່າງໆ ກໍປາກົດມີຄວາມເຂົ້າໃຈຂອງສັງຄົມທີ່ອາດຈະຄາດເຄື່ອນຈາກຄວາມເປັນຈິງ ແລະ ບໍ່ທັນເປັນເອກະພາບຢ່າງທົ່ວເຖິງ ຕໍ່ບາງວິທີການໃນການຈັດຕັ້ງປະຕິບັດຕົວຈິງຂອງຂະແໜງການ ຊຶ່ງອາດຈະເກີດຈາກການສື່ສານປະຊາສຳພັນຂອງຂະແໜງການຍັງບໍ່ທັນມີປະສິດທິພາບ ແລະ ບໍ່ກວ້າງຂວາງເທົ່າທີ່ຄວນ ເປັນຕົ້ນ ເມື່ອບໍ່ດົນມານີ້ ກໍ່​ມີ​ການ​ຮັບ​ຮູ້ ​ແລະ ​ເຂົ້າ​ໃຈຄາດ​ເຄື່ອນ ກ່ຽວ​ກັບແຈ້ງ​ການ ສະບັບວັນທີ 9 ແລະ ວັນທີ 13 ມິຖຸນາ 2022 ​ຂອງ ທະນາຄານການຄ້າຕ່າງປະເທດລາວ ກ່ຽວ​ກັບ​ການຖອນ​ເງິນ​​ ທີ່ໂອນ​ຜ່ານລະບົບບໍລິການຮັບເງິນດ່ວນ  Money gram. ໃນນາມກົມນະໂຍບາຍເງິນຕາ ຕາງໜ້າໃຫ້ ທະນາຄານແຫ່ງ ສປປ ລາວ ຂໍປະຊາສຳພັນມາຍັງບັນດາທ່ານ ໃຫ້ເຂົ້າໃຈເປັນເອກະພາບວ່າ: ປັດຈຸບັນ ທະນາຄານທຸລະກິດ ກໍຄື ລະບົບ Money gram ຍັງສືບຕໍ່ບໍລິການໃຫ້ປະຊາຊົນ ສາມາດຖອນເງິນໄດ້ຕາມປົກກະຕິ ຄືຜ່ານມາ. 

ຢຶດຢາບ້າໄດ້ 50 ມັດ ພ້ອມຈັບຜູ້ຖືກຫາ 2 ຄົນ.

ໃນວັນທີ 8 ມີຖຸນາ 2022 ເວລາ 11:10 ໂມງ   ເຈົ້າໜ້າທີ່ກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ໄດ້ມ້າງຄະດີກຸ່ມຄ້າ-ຂາຍຢາເສບຕິດ, ທີ່ໄດ້ເຄື່ອນໄຫວລັກລອບຄ້າ-ຂາຍຢາເສບຕິດຢູ່ເຂດທາງ 450 ປີ ເມືອງໄຊທານີ ນະຄອນຫຼວງວຽງຈັນ, ສາມາດຈັບຕົວຜູ້ຖືກຫາໄດ້ 2 ຄົນ, ຢຶດຂອງກາງຢາບ້າໄດ້ຈຳນວນ 50 ມັດ ເທົ່າກັບ 100.000 ເມັດ, ນ້ຳໜັກ 10,8 ກິໂຣກຼາມ, ໂທລະສັບ 1 ເຄື່ອງ, ປືນດັດແປງ 3 ກະບອກ ແລະ ລູກປືນ 21 ລູກ.

(more…)