25th Jun2022

ພິທີ​ໂຮມ​ຊຸມ​ນຸມ ແລະ ຂະ​ບວນ​ການ​ຍ່າງ​ມິ​ນິ​ມາ​ລາ​ທອນ​ເພື່ອ​ສຸ​ຂະ​ພາບ ​ໃນ​ໂອ​ກາດວັນ​ສາ​ກົນ​ຕ້ານ​ຢາ​ເສບ​ຕິດ ຄົບ​ຮອບ 35 ປີ.

by somchan

ໃນວັນທີ 25 ມິຖຸນາ 2022 ນີ້ກະຊວງປ້ອງກັນຄວາມສະຫງົບ ໃນນາມຕາງໜ້າໃຫ້​ລັດຖະບານແຫ່ງ ສ​ປ​ ລາວ ໄດ້​ຈັດພິທີໂຮມຊຸມນຸມ ແລະ ຂະບວນການຍ່າງມິນິມາລາທອນເພື່ອສຸຂະພາບ ຢູ່​ທີ່ສວນປະຕູໄຊ ນະຄອນຫຼວງວຽງຈັນ ເນື່ອງໃນໂອກາດສະເຫຼີມສະຫຼອງວັນສາກົນຕ້ານຢາເສບຕິດ ວັນທີ 26 ມິຖຸນາ ຄົບຮອບ 35 ປີ. ໂດຍເປັນກຽດເຂົ້າຮ່ວມຂອງ ປອ ໄຊສົມພອນ ພົມວິຫານ ປະທານສະພາແຫ່ງຊາດ, ມີ ພົອ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ, ປອ ກິແກ້ວໄຂຄຳພິທູນ ຮອງນາຍົກລັດຖະມົນຕີ, ພ້ອມດ້ວຍບັນດາການນໍາພັກ-ລັດ, ບັນດາທູຕານຸທູດ, ອົງການຈັດຕັ້ງສາກົນປະຈໍາ ລາວ, ບັນດາກະຊວງ, ອົງການຈັດຕັ້ງທີ່ກ່ຽວຂ້ອງ ແລະ ມວນຊົນໃນນະຄອນຫຼວງວຽງຈັນເຂົ້າຮ່ວມ.

ໃນໂອກາດດັ່ງກ່າວ ພົອ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້​ມີຄຳເຫັນວ່າ: ບັນຫາຢາເສບຕິດ ແມ່ນບັນຫາກວມລວມຂອງໂລກ ທີ່ເປັນອັນ ຕະລາຍຮ້າຍແຮງ ຕໍ່ມວນມະນຸດ, ເປັນອຸປະສັກ ທີ່ກົດຫນ່ວງທ່ວງດຶງ ໃນການສ້າງສາພັດທະນາເສດ ຖະກິດ-ວັດທະນາທໍາ-ສັງຄົມ, ເປັນບໍ່ເກີດແຫ່ງອາຊະຍາກໍາ, ການສໍ້ລາດບັງຫຼວງ ທັງນໍາເອົາຄວາມ ຫາຍຍານະ ເຂົ້າສູ່ຊີວິດສ່ວນຕົວ ແລະ ຄອບຄົວຂອງຜູ້ຕົກເປັນທາດ. ຕາມຂໍ້ມູນຂອງອົງການສະຫະປະຊາຊາດ ເພື່ອຄວບຄຸມຢາເສບຕິດ ແລະ ຕ້ານອາຊະຍາກໍາ, ການຍຶດຢາເສບຕິດ ປະເພດຢາບ້າ ແລະ ຢາໄອສ໌ ໃນພາກພື້ນອາຊີຕາເວັນອອກ ແລະ ອາຊີຕາເວັນອອກສ່ຽງໃຕ້ ແມ່ນເພີ່ມຂຶ້ນຢ່າງຕໍ່ເນື່ອງ;ຕາມຂໍ້ມູນໃນປີ 2020 ມີເຖິງ 170 ໂຕນ, ໃນນັ້ນ, ບັນດາປະເທດລຸ່ມແມ່ນ້ໍາຂອງ ແມ່ນກວມເອົາ 71 % ຂອງປະລິມານຢາເສບຕິດ ທີ່ຍຶດໄດ້ທັງຫມົດ; ການນໍາໃຊ້ສານເຄມີຕົ້ນ ເພື່ອນໍາໄປຜະລິດ ເປັນຢາເສບຕິດປະເພດຕ່າງໆ ໃນຂົງເຂດອາຊີຕາເວັນອອກສ່ຽງໃຕ້ ແມ່ນຍັງບໍ່ສາມາດຄວບຄຸມໄດ້ດີເທົ່າທີ່ຄວນ.

ປະເທດລາວ ກໍ່ປະເຊີນຫນ້າກັບໄພຮ້າຍ ຈາກບັນຫາຢາເສບຕິດ ທີ່ແຜ່ລະບາດໃນສັງຄົມ; ນັບ ແຕ່ຕົວເມືອງ ຮອດຊົນນະບົດທີ່ຫ່າງໄກສອກຫຼີກ ໃນລະດັບທີ່ແຕກຕ່າງກັນ, ບັນຫາຢາເສບຕິດ ໄດ້ກາຍເປັນຫນຶ່ງ ໃນປະກົດການຫຍໍ້ທໍ້ຂອງສັງຄົມ, ການລະບາດຂອງຢາເສບຕິດ ໄດ້ເປັນຫນໍ່ແຫນງ ແລະ ເປັນສາຍເຫດຕົ້ນຕໍ ຂອງການໃຊ້ຄວາມຮຸນແຮງ ແລະ ສິ່ງຫຍໍ້ທໍ້ຕ່າງໆໃນສັງຄົມ, ໄດ້ສົ່ງກະທົບໂດຍກົງຕໍ່ຊີວິດ, ຊັບສິນ, ສຸຂະພາບຂອງປະຊາຊົນ ໂດຍສະເພາະ ໄດ້ເບື່ອເມົາເຍົາວະຊົນ, ຊາວຫນຸ່ມ, ໄວຫນຸ່ມ ທີ່ເປັນກໍາລັງແຮງສືບທອດພາລະກິດ ແລະ ອະນາຄົດຂອງປະເທດຊາດ.ຍ້ອນແນວນັ້ນ, ໃນຊຸມປີຜ່ານມາ ພັກ, ລັດຖະບານ, ກໍາລັງປ້ອງກັນຄວາມສະຫງົບ ກໍ່ຄືອົງການປົກຄອງທ້ອງຖິ່ນ ໄດ້ຖືເອົາການແກ້ໄຂບັນຫາຢາເສບຕິດ ເປັນວຽກງານບູລິມາສິດທີ່ສໍາຄັນ ແລະ ຊີ້ນໍາ-ນໍາພາ ການຈັດຕັ້ງປະຕິບັດວຽກງານດັ່ງກ່າວຢ່າງຈົດຈໍ່ ແລະ ຈິງຈັງ ໂດຍໄດ້ສົມທົບຫຼາຍມາດຕາການ ເພື່ອແກ້ໄຂເຊັ່ນ: ໄດ້ກໍານົດແຜນແມ່ບົດແຫ່ງຊາດ ໃນປີ 1994-2020, ມີກົດ ຫມາຍ ແລະ ຈັດຕັ້ງປະຕິບັດກົດຫມາຍ ວ່າດ້ວຍຢາເສບຕິດ ສະເພາະແຕ່ສູນກາງລົງຮອດທ້ອງຖິ່ນ ໂດຍແມ່ນກະຊວງປ້ອງກັນຄວາມສະຫງົບເປັນໃຈກາງ ແລະ ຍ້ອນເຫັນໄດ້ຄວາມຈໍາເປັນອັນຮີບດ່ວນ ເຖິງການເລັ່ງທວງ ໃຫ້ມີການແກ້ໄຂບັນຫາຢາເສບຕິດ; ໃນມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ໄດ້ກໍານົດວ່າ ຕ້ອງຍົກລະດັບການສະກັດກັ້ນ ແລະ ແກ້ໄຂຜົນຮ້າຍຈາກບັນຫາຢາເສບຕິດ ໃຫ້ເປັນຫນ້າທີ່ຕົ້ນຕໍຂອງທົ່ວສັງຄົມ ແລະ ເປັນສ່ວນຫນຶ່ງໃນວາລະແຫ່ງຊາດ ດັ່ງນັ້ນ, ໃນກອງປະຊຸມສະໄຫມວິສາມັນ ເທື່ອທີ 1ຂອງສະພາແຫ່ງຊາດ ຊຸດທີ IX ຈິງໄດ້ສືບຕໍ່ຍົກ ລະດັບ ແລະ ໄດ້ຮັບຮອງເອົາການແກ້ໄຂບັນຫາຢາເສບຕິດ ເປັນ 1 ໃນ 2 ວາລະແຫ່ງຊາດ ຂອງລັດ ຖະບານ ພ້ອມທັງໄດ້ປັບປຸງກົດຫມາຍ, ນິຕິກໍລຸມກົດຫມາຍຈໍານວນຫນຶ່ງ ເພື່ອຮັບປະກັນເຮັດວຽກ ງານຄວບຄຸມ, ສະກັດກັ້ນ ແລະ ແກ້ໄຂບັນຫາຢາເສບຕິດ ແຕ່ປີ 2011-2023 ໃຫ້ມີຜົນສໍາເລັດ.

ໂອກາດດຽວກັນນີພັອ ປອ ບົວພັນ ຟອງມະນີ ຮອງຫົວໜ້າກົມໃຫຍ່​ຕຳຫຼວດ ຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກໍໄດ້​ໃຫ້​ສຳພາດວ່າ: ເນື່ອງໃນໂອກາດວັນສາກົນຕ້ານຢາເສບຕິດ ຄືວັນທີ 26ມິຖຸນາ 1987 ຫາ 26 ມິຖຸນາ 2022 ທີ່ໄດ້ຫມູນວຽນມາບັນຈົບຄົບຮອບ 35 ປີ, ກະຊວງປ້ອງກັນຄວາມສະຫງົບໃນນາມຕາງໜ້າໃຫ້​ລັດຖະບານແຫ່ງ ສ​ປ​ ລາວ ໄດ້​ຈັດພິທີໂຮມຊຸມນຸມ ແລະ ຂະບວນການຍ່າງມິນິມາລາທອນເພື່ອສຸຂະພາບ ຢູ່​ທີ່​ສວນປະຕູໄຊ ນະຄອນຫຼວງວຽງຈັນ ດ້ານຫນຶ່ງກໍເພື່ອສົ່ງເສີມສຸຂະພາບ ໃຫ້ມີຄວາມແຂງແຮງ ແລະ ຮ່ວມແຮງຮ່ວມໃຈກັນຕ້ານໄພຢາເສບຕິດ, ອີກດ້ານຫນຶ່ງ ກໍເພື່ອໂຄສະນາ, ປຸກລະດົມທົ່ວສັງຄົມ ໃຫຮັບຮູ້, ເຂົ້າໃຈຢ່າງກ້ວາງຂວາງ ແລະ ຮ່ວມແຮງຮ່ວມໃຈຕ້ານໄພອັນຕະລາຍຂອງຢາເສບຕິດ, ເພື່ອສົ່ງເສີມຄວາມຮັບຮູ້, ຄວາມເຂົ້າໃຈຢ່າງເລິກເຊິ່ງ ຕໍ່ຜົນສໍາເລັດຂອງການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃນ 1 ປີ ທີ່ຜ່ານມາ.

ສປປ ລາວ ກໍເປັນປະເທດຫນຶ່ງທີ່ພວມປະເຊີນຫນ້າຕໍ່ກັບໄພຂົ່ມຂູ່ຈາກບັນຫາຢາເສບຕິດ ເຊິ່ງມັນໄດ້ແຜ່ລະບາດໄປທົ່ວທຸກບອນ ນັບແຕ່ຕົວເມືອງໄປຮອດຊົນນະບົດ, ເຂດຫ່າງໄກສອກຫຼີກ ໃນຫຼາຍລະດັບທີ່ແຕກຕ່າງກັນ, ບັນຫາຢາເສບຕິດໄດ້ກາຍເປັນຫນຶ່ງໃນປະກົດການຫຍໍ້ທໍ້ຂອງສັງຄົມ ການລະບາດຂອງຢາເສບຕິດໄດ້ເປັນຫນໍ່ແຫນງ, ເປັນສາຍເຫດຕົ້ນຕໍ ຂອງການເກີດຄວາມຮຸນແຮງ ແລະ ສິ່ງຫຍໍ້ທໍ້ຕ່າງໆໃນສັງຄົມ, ໃນຊຸມປີຜ່ານມາ ພັກ ແລະ ລັດຖະບານ, ອົງການປົກຄອງທ້ອງຖິ່ນ ໄດ້ຖືເອົາການແກ້ໄຂ ບັນຫາຢາເສບຕິດເປັນວຽກງານບູລິມະສິດຫນຶ່ງທີ່ສໍາຄັນ ໂດຍໄດ້ສົມທົບຫຼາຍມາດຕາການເພື່ອແກ້ ໄຂບັນຫາດັ່ງກ່າວ.

Off